A Quenda do Libro viaxa a Allariz e Ourense

Desta volta eran os maiores do club os que viaxaban  para vivir unha xornada de convivencia entre a rapazada e desta coa poesía.

Lamentablemente non puideron asistir, por razóns varias, un fato de rapaces e rapazas  aos que lles queremos dicir que tamén estiveron connosco.

Saímos  do Lama das Quendas trinta e cinco persoas  coa  arela de pasar unha boa xornada por terras ourensanas. E así foi.

Chegamos a Allariz onde quedaramos coa guia , Vanesa , coa que paseamos pola beira do Arnoia e polo casco histórico mentres nos ofrecía abondosas explicacións sobre a historia e os monumentos da vila.O día era soleado e agradable para camiñar e a rapazada gozou co paseo e mesmo aproveitaron anacos para comentarme que xa  leran tal ou cal libro ou as sensacións que lles provocaban as lecturas coas que están. 

E  foi no Museo da Moda e o Museo do Xoguete onde realmente o pasamos "coma nenos".

No da moda vestíronse cos traxes  expostos e , presentad@s por un "mestre de cerimonias" improvisado, desfilaron dous mozos e dúas mozas ante os aplausos dos compañeiros e compañeiras.Mesmo saíu  a "deseñadora" acompañada  d@s modelos para recoller as felicitacións finais.

No do xoguete  puideron ver múltiples xogos e xoguetes cos que nos divertiamos os nenos e nenas doutra xeración. Realmente so se nos oía ás profesoras dicir " este tíñao eu" esto "tíñao meu irmán". Foi interesante que contemplasen estas,para eles ,"reliquias" coas que dificilmente saberían entreterse hoxe.

O maior interés amosárono por un fútbolín do que lles chocou que non se parecera moito aos de agora e ,aínda máis, que fose para as  mulleres.

Despois, dirixímonos  a Requeixo de Valverde para pasear polo  Ecoespazo O Rexo onde puidemos contemplar as esculturas e pinturas de Agustín Ibarrola antes de encamiñarnos a Ourense para ver o Monumento de As Burgas. Ao seu carón , á sombra lemos e escoitamos poemas do libro Calados Esconxuros do poeta ourensán Antón Tovar.

Un paseo polo casco histórico, algo fresco na Praza Maior e... destino ás Burgas de canedo e Pozas de Outariz!

Alí acabamos esta viaxe da que cómpre subliñar o saber estar do alumnado en calquera dos lugares visitados e a fantástica camaradaría que existiu durante todo o día entre todos e todas.

De verdade : foi un pracer!!!