21 dic 2015

Hoxe comezan as vacacións

 

20 dic 2015

Buscas un libro?

Un libro sempre é un bo agasallo. Regalar lectura é un acto xeneroso que vale moito máis do que custa.
Se non sabes que ler ou que libro agasallar  nestas datas , é posible que entre as  suxestións da Biblioteca do Lama das Quendas  atopes algo que che interese.
E se queres envolvelo de maneira diferente e orixinal aínda será máis aprezado. 
No seguinte enlace coa páxina do huffingtonpost ,podes atopar  diferentes maneiras de envolver un libro para que sexan preciosos o continente e o contido. 
Nunca está de máis regalar cultura, e os libros son unha mostra dela.

19 dic 2015

2016 , Ano de Manuel María

O 17 de maio de 2016 será  o Día das Letras Galegas  adicado ao poeta Manuel María.
Nós, dende o I.E.S Lama das Quendas ,queremos festexalo como se merece e buscamos o xeito de renderlle unha homenaxe na que nos impliquemos toda a comunidade educativa e o pobo de Chantada.
Así que a proposta que dende a Biblioteca e o Club de de Lectura , en colaboración con Televinte, vos facemos é a de conseguir que cada día lectivo poida aparecer ,ao final do Telenovas, unha persoa lendo un poema do poeta chairego. 
Xa hai medio cento lidos, hai outros moitos que ao regreso das vacacións de nadal serán gravados pero temos que ser máis porque o ano é moi longo. Precisamos que nos axudedes a lograr este reto.
Se estás dispost@ ponte en contacto connosco no I.E.S Lama das Quendas. Darémosche o poema e faremos a gravación.Ou, como se di no vídeo, de Televinte, achégate a esta canle de televisión e tamén cho gravarán.
Escoita.
Lembrade, o 7 de xaneiro comezaran a aparecer en Televinte.
@s que xa leron , @s que teñen o poema na casa e están practicando para gravar en xaneiro, @s que teñen intencións de  colaborar, grazas.Moitas grazas!
Que o sentimento , as emocións de Manuel María cheguen a nós a través dos seus poemas!!
Será un ano de poesía no Lama das Quendas!!

18 dic 2015

Os 40 principais

 Dende a Asesoría de Bibliotecas escolares acaban de facer pública a táboa d@s 40 autor@s máis lidos polos Clubs de Lectura no 2014-2015.
Podedes consultala e comprobar que entre eses 40 nomes , están  seis dos autor@s que nós lemos no curso pasado.
Para facilitarvos a tarefa, velaí vai a listaxe des@s que nos fixeron gozar coas súas palabras , que nos permitiron vivir tantas vidas,  segundo a orde que ocupan na publicación de  Ler en mancomún.
Foron: Agustín Fernández Paz,Jordi Sierra i Fabra, John Green, Xabier P. Docampo,Fina Casalderrey, Markus Zusak. 
Agradecerlles a tod@s @s escritor@s  a súa xenerosidade para compartir connosco as súas historias e permitirnos  , como dicía Fernando Pessoa" soñar da man doutro".

17 dic 2015

Síntese de artes


As descricións e, sobre todo,  a falta de diálogo levaron ao alumnado de 4º de E.S.O e P.D.C. a cualificar De Profundis de Miguelanxo Prado como historia " aburrida" aínda que tod@s  eloxiaron as ilustracións.
Comentouse que a obra é  unha síntese das artes, unha mestura de música, pintura, literatura que pretende provocar en nós emocións , que consegue que disfrutemos cos sentidos.
Cada asistente falou dos debuxos que máis lles agradaban:a casa rodeada do mar unhas veces quedo outras bravo; os cadros que aparecen na casa ( unha especie de "cadros de futuro" porque  neles o pintor debuxou o que logo sucedería); o gato negro coa lúa recortada ao fondo; o barco encallado; o pintor ao timón do "seu barco" no fondo do mar; a vasta paisaxe multicolor do fondo mariño ...
Falamos do rol que desenvolven algúns dos personaxes, como a serea,e houbo, ao respecto, interpretacións diferentes
A nosa rapazada non é nada supersticiosa ao contrario que os mariñeiros da nosa historia, pero concordan co narrador  en que, ás veces, o tempo pasa moi rápido ( cando estás nun exame, cando estás facendo algo que che gusta) e outras, devagar. ( Non "leades" que lles gusta facer un exame , eh!)
E se as almas dos mariñeiros afogados  se transforman en gaivotas, na reunión  estivo quen desexaría que o seu espírito se reencarnase en mosquito, can de palleiro ou con pedigree, caimán, corzo, bolboreta, pingüín, paxaro, ratiño, gato, cabaliño de mar...
Tamén hai quen quixera  renacer coma  ser mitolóxico:  serea, ou coma personaxe da ficción: "Bambi". Ai, cantas cousas lle debemos á factoría Disney!!
Pois nada, que se cumpran os soños!!! 

11 dic 2015

Trasladarse no tempo e no espazo

Enfrontarse á  El Héroe Discreto,para as persoas do noso club de adultos , significou, por un lado ,deixar á beira a carga mediática que sempre, pero máis nos últimos tempos, acompaña a Mario Vargas Llosa, o autor. E por outro , esquecerse de que é un premio Nobel e racionalizar, por tanto, que pode facer obras marabillosas e outras...non tanto.
Superados eses dous prexuízos, lemos a novela e velaí vai o que na amena tertulia  da derradeira reunión , se puxo sobre a mesa a propósito dela.
Gustar ou desgustar quizais non sexa a palabra.Pero se vos digo que , sen estar pesaros@s por lela , non sería este un libro que recomendarían se alguén lles pedira consello, xa imos entendendo o sentir destes pais e nais asistentes.
Díxose que "non emociona", "non ten intriga e soluciona moi rápido os conflitos", "ten pouca acción"...Comentouse que gusta a ironía que emprega nalgúns momentos, a linguaxe ,as oracións curtas, moitas expresións do español de América...
Discutiuse sobre se  a técnica narrativa empregada ( permitídeme usar esa expresión)  intenta atraer á xente maior ou á xente nova  e argumentouse a favor de cada punto de vista.E tamén houbo discrepancias sobre  o acerto ou erro de que as historias fosen paralelas ,de xeito que algunha persoa comentou que ía lendo e pensando en "capítulos pares e impares" e a outros íalles sorprendendo o devir da narración e cuestionábanse se sería así ata a fin da historia ou terían, nalgún momento, conexión.Para algúns ese paralelismo foi un problema e queixáronse de excesivas digresións.
Para outr@s o espazo no que se desenvolveu a acción foi un lastre ao longo de toda a lectura.
A propósito da  historia que conta houbo coincidencia en que era simple, folletinesca, de telenovela, un pouco "rancia",verosímil, crible pero non nestes tempos, non aquí.E foron máis alá: reflicte estereotipos daqueles pobos, normaliza situacións moi negativas para as mulleres,manifesta certa melancolía polo pasado...
E como se psicanalizaramos  ao autor ,tamén se escoitou o do "certo paralelismo" coa súa vida, ou o que coñecemos dela.

7 dic 2015

Reunión d@s adult@s

Sobre este libro, e seguro que do seu autor, conversaremos o vindeiro mércores, 9 de decembro, na reunión prevista do club de lectura de pais,nais e amig@s de A Quenda do libro.
Ás 17:30 h. , na Biblioteca do noso intituto os nomes de Felícito, Ismael ,Fonchito..., personaxes da novela, e o de Mario , o autor, soarán acompañados de críticas favorables e outras desfavorables, porque xa algunhas persoas me fixeron chegar as súas opinións ao respecto da novela, ben cando devolveron o libro á Biblioteca, ou en encontros pola rúa.
Na diversidade está a riqueza. É moi bo que haxa discrepancias nas valoracións porque iso permitiranos afondar na lectura e  colocarnos , figuradamente, en posicións diferentes con ópticas distintas.
Xa dicía Marco Aurelio: "Todo o que escoitamos é unha opinión, non un feito.Todo o que vemos é unha perspectiva , non é a verdade."
Será interesante.


4 dic 2015

Reunión do alumnado de 4º de E.S.O. e P.D.C.

As vacacións de nadal están preto e antes celebraremos a reunión do alumnado de 4º A e B  de E.S.O. e 4º de P.D.C para comentar De profundis de Miguelanxo Prado.
Aínda hai exemplares na Biblioteca para aquel@s que aínda non leron esta fermosa historia de amor debuxada polo  coruñés Miguelanxo Prado que acadara o Premio Nacional do Cómic no 2013 pola súa obra Ardalén. 
Traede elixida a vosa ilustración favorita e alí argumentaredes  a escolla.
Ademáis da lectura do club, tod@s aquel@s que  queren afondar na obra deste debuxante ,podedes atopar na nosa biblioteca  máis libros de banda deseñada deste mesmo autor: Trazo de Xiz, Ardalén, A Mansión dos Pampín, Pedro e o Lobo...
Vémonos o martes,15 de decembro, durante o recreo  nas aulas de reunión habituais.

2 dic 2015

Reflexo do que ocorre neste mundo

Co alumnado de 2º de Bacharelato comentamos A Revolta dos animais.Este libro ,que lles gustou , deixoulles un sabor agridóce porque ,se era válido  para a data da súa publicación no 1945 ,e  serve de explicación para moitos comportamentos de  hoxe , setenta anos despois, causa profundo pesar observar que o ser humano, a sociedade non aprendeu nada.
Un dos rapaces fixo un resumo da novela de Orwell introducindo os apuntamentos que consideraba oportuno. @s demais asistentes fomos verbalizando as nosas achegas ata  rematar criticando as consecuencias do abuso de poder ( Jones, Napoleón); a triste e indesexable aniquilación desas persoas que buscan o ben común , desas que farían progresar a sociedade ( Snowball) porque fan perigar o poder;a tiranía á que se chega a conveniencia dos que mandan; a manipulación da verdade en función dos intereses (Squealer) ...
Da fábula da que todos debiamos extraer ensinanzas, pasamos a comentar a obra desde a perspectiva da sátira política que tamén se ten visto nas páxinas de Orwell e así, fomos comentando a quen representaba cada personaxe no mundo real da primeria metade do século XX.
Do xa dito aos tempos actuais non houbo que dar un grande paso e acabamos a reunión falando das nosas normas constitucionais  ,recentemente consultadas por algún dos rapaces por mor do emerxente independentismo, e do incumprimento de moitos dos  artigos da Constitución do 78.
Agardo que cando est@s moz@s de 2º de bacharelato, teñan fill@s de  17-18 anos lles aconsellen ler A Revolta dos animais  e que , cando conversen sobre o lido ,@s escoiten exclamar : pero isto xa non pasa nestes tempos!
Daquela será verdadeiro por fin o sétimo mandamento: Tod@s seremos iguais.

30 nov 2015

Esquecín olvidar

O pasado martes, tamén o alumnado de 3º A tivo a súa reunión para falar de Engurras de Paco Roca. Nela comezaron identificando ao protagonista cunha cor. Escolleron as cores que eles asocian coa tristeza, a soidade e mesmo a morte: negra, gris,marrón... en todo caso  cor escura.
Gustoulles  o personaxe de Emilio, ao que consideran realista, intelixente , divertido e un bon amigo. Con respecto ao matrimonio que comparte mesa cos protagonistas quedaron conmovidos pola historia de amor desa  entrañable parella.
Os nosos rapaces comprenden a enfermidade do alzhéimer e, algúns , conviven con ela: María ten unha  tía enferma; Tania, unha avoa;José Ángel a bisavoa;aAba,un tío-avó...
Cando lles pedimos que intenten plasmar nun debuxo o que sentiron co libro, deixáronnos  sinxelas imaxes( o tempo era pouco) coma estas: 
 

29 nov 2015

Reunión do alumnado de 2º de Bacharelato

 Os animais rebeláronse contra a tiranía do granxeiro. E que fixeron? Botárono e quedaron eles  mandando na granxa.
Parece que as cousas saian como deben saír.
En toda sociedade hai normas. Na granxa animal  escribíronas  e a derradeira era perfecta:
"Todos os animais somos iguais".
Quen non envexaría unha sociiedade que promete ser tan xusta?
Conversaremos  sobre o que acontece nesta fábula satírica. Faremos una lectura literal e tentaremos  interpretar as situacións vividas polos personaxes que nela aparecen, porque dan para moito.
O martes poñeremos en común o que pensamos e depois, contarémolo aquí.

26 nov 2015

O alzhéimer rouba vidas

O que sorprendeu ao alumnado de 3º B de E.S.O. da lectura de Engurras de Paco Roca foi o esquecemento, a soidade, a dor, a pena, a frustración,a familia, a vellez, a solidariedade...
Segundo se adentraban nas súas páxinas, como lectores da historia e observadores das imaxes debuxadas,  sentíanse, maioritariamente, tristes.Pero tamén houbo quen se notou preocupad@, empátic@, angustiad@, morriñent@, reflectid@...E cadaquén sabía o porqué destes adxectivos.
Resumimos a historia intercalando as opinións que estimaron oportuno achegar e esmigallamos as consecuencias da enfermidade nas persoas  que "sofren o alzhéimer", como  expresou con precisión unha rapaza ao falar da súa avoa que , desgraciadamente, faleceu xa.
Quixemos darlle un final  diferente ao relato e nese momento houbo discusión.Por unha banda estaban @s que se renderon á realidade e engadiron un desenlace no que , sabendo que non cura, devolven  a Emilio á casa da familia para que pase os derradeiros anos cos seus, desexando que morra con  alguén que o quere ao seu carón.Por outra,@s que se moveron no campo da ficción  e  fixeron que Emilio e os seus amig@s compartiran vivenda na cidade; que curase; que a enfermidade non avanzase  con rapidez e durante moito tempo puidese ter certos recordos e houbo quen  seguiu un razonamento moi lóxico e sorprendente: se estas persoas  son como nenos, por que non ensinarlles todo de novo, coma @s cativ@s?
Unha mágoa que a realidade e a ficción, neste caso, non concorden!


25 nov 2015

Pinta o mundo de laranxa!

Hoxe ,25 de novembro é  o  Día Internacional da Eliminación da Violencia contra a Muller. Neste ano a ONU anímanos a realizar  " eventos laranxas" entre o 25 de novembro e o 10 de decembro, data na que se conmemora o Día dos Dereitos Humanos.A actividade consiste en compartir  en facebook e/ou twitter  fotos, mensaxes e/ou vídeos nos que se observe  o noso lugar , o noso vecindario vestido de laranxa.
Segundo un informe da ONU ,  unha de cada tres mulleres sufriu violencia física ou sexual, principalmente po parte dun compañeiro sentimental.Podes ampliar a información nesta  infografía 
Cos nosos comportamentos e actitudes debemos colaborar na consecución dun mundo libre de agresións dun ser humano a outro conxénere.
Dende o noso centro, xa hai anos que estamos traballando nesa dirección  con charlas informativas , en obradoiros do Club de Lectura e  mesmo, hai uns anos, realizando unhas curtametraxes  ideadas polo coordinador da Biblioteca do instituto, gravadas coa colaboración de Televinte  e que protagonizaron  alumn@s que eran do centro.
Seguen sendo actuais e desexamos que esas situacións nunca se den entre nós. A algunhas persoas mesmo lle parecerán "tonterías", actitudes sen importancia , pero "daqueles pos veñen estas lamas". E a única lama boa é a Lama das Quendas!!
Por se queredes  velas de novo deixámosvolas aquí.

22 nov 2015

Reunión do alumnado 3º A e B de E.S.O. e P.M.A.R.

Poderás facelo na reunión que o alumnado do nivel de 3º de ESO terá na Aula Multimedia e de 1º de E.S.O ,porque nos dividiremos en grupo A e B, coma sempre.
Será ás 11:15 h , durante o recreo.
Sería convinte que trouxerades panos porque  alguén xa me contou que  as bágoas corrían polas súas meixelas durante a lectura.
Snif!!


 

19 nov 2015

E do lobo que foi?

Morreu ou non morreu? O alumnado está seguro de que si, que morreu. E logo..., como é que se escoita  á parrula e ó  paxariño discutir no estómago do lobo? A ver? Como? Houbo explicacións varias e ,despois, buscamos finais alternativos ao tempo que comentamos o desenlace que lle dera , no seu día, Sergei Prokofiev.
Escoitamos un anaco do conto na voz de Mon Santiso , coa interpretación da Xove Orquestra de Galicia (XOG) que quedou de fondo mentres falamos acerca do libro en si ,de ser afeccionad@s ou non á banda deseñada e, finalmente ,das ilustracións escollidas  pola rapazada.
As persoas que o desexaron manifestaron as súas preferencias en canto ás viñetas e argumentaron a súa escolla.
Esta foi a mestura que resultou.
Tamén intentamos atopar algunha ensinanza que poderíamos extraer do conto.So houbo un rapaz que se animou a falar dunha,pero mellor  non  a contamos.Non sexa que a aprendades!
Ao son dos intrumentos de vento e percusión ,cada un regresamos ao noso labor cun marcador de lectura artesanal ,co que agasallamos ao alumnado, no peto.

18 nov 2015

Vivenda? Grande e luxosa?

"Entramos" na "Mansión dos Pampín" e descubrimos que nos timaran: os Pampín non resultaron ser unha familia da elite, senón de clase media   e residentes nun piso  un tanto ordinario, como moitos dos que abundan nas nosas vilas e cidades. Despois de facer preguntas para comprobar a lectura da historia.Soubemos que se cumpriran os nosos desexos: non só leron e comprenderon o libro, ademais gustoulles. Fixámonos en varios deseños: a casa herdada, a praza da pequena vila onde residen o alcalde e o contratista de obras, as imaxes que representan a Santiago de Compostela e, por último, na praia onde os protagonistas van pasar as súas vacacións. Os rapaces emitiron xuízos sobre estas imaxes e valoraron positivamente a arquitectura tradicional da praza da vila, o Obradoiro de Santiago, e a paisaxe que rodea a vella casa que herdaron os Pampín. Polo contrario desaprobaron as novas construcións da vila e o modelo urbanístico  de macro edificios en se rie que predomina nasa grandes cidades, e o que é peor, ás veces en zonas que deberían formar parte do patrimonio histórico eríxense serios monumentos ao feísmo en nome do disgusto pola estética e o gusto polo poder do diñeiro. Por suposto, os nosos alumnos prefiren a beleza das praias salvaxes ás costas salvaxemente urbanizadas onde veranean os Pampín.

15 nov 2015

Reunión do alumnado de 2º de E.S.O.

Se xuntamos un bosque, un neno e un lobo...que sairía de tal mestura? Un conto!! Claro!
Pois un relato fascinante , cheo de fermosísimas imaxes  que sairon da man dun artista como  Miguelanxo Prado, e unha entrañable  peza musical son a combinación perfecta para que o vindeiro martes, a rapazada de 2º de E.S.O. o pase ben na reunión do Club de Lectura.
Será , coma sempre, ás 11:15. Tod@s na Aula multimedia.
Faremos que dure a fascinación do bosque tal como nolo  desexou o debuxante cando visitou Chantada, hai xa uns aniños.(Mirade na foto)

13 nov 2015

Feliz Día das Librerías

Cantos de vós pensastes, algunha vez, que  vos gustaría moitísimo ter unha librería?
Cando eu era cativa, o que máis me gustaba, despois de xogar c@s amig@s, era ler.Onde eu vivía non había librerías.A máis próxima estaba  nunha vila a 15Km .Cada vez que ,co meu pai case sempre, entraba nunha librería sentía que alí era  o lugar no que non me importaría pasar horas e horas. Que gozada poder ler, sen estragar, canto libro estivera ao alcance da miña man!!
De regreso á casa, organizaba con caixas unha especie de andeis nos que colocaba os libros que había na casa( non moitos) e vendíallos (facía que llos vendía) aos meus irmáns e amig@s.
Así pensaba.E así xogabamos daquela.
Cando me preguntaban que quería ser de maior, eu respondía que ou perruqueira, ou ter unha librería.Nada que ver unha profesión coa outra.Ou si? O caso é que  tamén rematei adicándome a algo relacionado coas"cabezas".
En calquera caso, teño pasadas moitísimas horas da miña vida en librerías nos lugares nos que vivo ou visito. Agardo pasar moitas máis e desexo que vós tamén gocedes da maxia que nelas se respira.Hoxe e sempre.
 

12 nov 2015

Somos da aldea

       E ben orgullosos que nos sentimos!!
      Pero os protagonistas da nosa lectura, a familia Pampín, parece que nada da aldea lles resulta atractivo.
      Estes Pampín teñen unha idea ben equivocada  sobre o que é "calidade de vida", pensan os nosos rapaces e rapazas.
      Miguelanxo Prado, en  A Mansión dos Pampín  creou unha familia que, como comentaba a rapazada, xa se vía que era peculiar.Para empezar, nin trataba nin quería á defunta tía,por iso ela deixo o testamento do xeito que quedou. Nós sentenciamos que lles estivo ben.
      Despois tampouco souberon valorar, nin mellorar, a herdanza porque foron un chisco parvos ( ou pode que "un moito") ao deixárense enganar polo alcalde e mailo constructor que son os personaxes máis detestables do libro polas malas artimañas que empregan para conseguir terra na que contruír.Compran a prezos ínfimos enganando aos vendedores que aínda lles están agradecidos. Hai que ser babiolos!!
      Gustoulles o cómic. E del saltamos a outras cousas.
      Metidos na discusión sobre a vivenda que escollerían entre catro que se lles ofrecían, houbo empate entre unha casa tradicional restaurada e outra construída sen moitas pretensións.So un alumno escolleu a casa representativa da arquitectura actual, e ninguén a gran casa contruída según modelos pouco rigorosos. Argumentando na defensa da casa tradicional, houbo un rapaz que esgrimiu razóns tan convincentes que ... creo que nos convenceu totalmente.
      Sobre esa imaxe, tan espallada pola nosa contorna ,de edificacións novas  de dubidosa adecuación ao medio, sobre o  constante abandono das contrucións patrimoniais, e sobre  casas restauradas preto de Chantada,  que recoñeceron como modelo de poñer en valor o que temos para que non desapareza , trataron os últimos comentarios.
      Esta rapazada  está ben contenta ( e eu que me alegro) de vivir nunha aldea ou vila pequena coa calidade de vida da que podemos gozar cada día.Comentouse que quixeran insultar a  alguén dicíndolle que "era  da aldea" e @s asistentes, tod@s a unha , dixeron que para el@s era un piropo que moito lles agradaba.
      Pode que o día de mañá ,calquera destes xoves teña a obriga de tomar decisións que afecten ao noso territorio para mellorar a súa habitabilidade e preservalo.Daquela, tomarán as decisións correctas, se seguen pensando igual.
Estamos en boas mans!!

8 nov 2015

Reunión do alumnado de 1º de E.S.O.

Como che gustaría que fose a túa casa? Gustaríache ter unha mansión como queren os Pampín ? 
Que é unha casa para ti?
Disto e doutras cousas que hai no  libro, tanto en imaxes como en texto,  falaremos o vindeiro martes,10 de novembro.
Será coma sempre , na hora do recreo na Aula Multimedia e na de 1º  de E.S.O.



7 nov 2015

Os nosos libros de outono

Estas son as lecturas dos diferentes grupos de a Quenda do Libro.
Quenqueira que sexas, se che apetece ler algunha podes , despois, asisitir as nosas reunións ( consulta o calendario da marxe dereita do blog ) ou mandarnos a túa opinión seleccionando a pestana do foro  e participando.

6 nov 2015

Adeptos ao cómic

Que son cómics? que cómics coñezo? Que personaxes de cómic podo nomear?    
Todas esas preguntas foron respondidas polas persoas asistentes á reunión do pasado martes na que falamos - e vimos vídeo- dos antecedentes do cómic , das primeiras  tirasde cómic que se coñecen co seu pintoresco personaxe  "o rapaz amarelo" ( the yelow kid)  e o primeiro uso do bocadillo para conter a mensaxe dun personaxe.Acabamos  citando os protagonistas máis sonados.Aínda que lle custou á rapazada , en canto viron as imaxes decatáronse de que eran moitos os coñecidos.
Chamoulles a atención saber o ano de aparición deses personaxes porque algún, de verdade que é ben vello! Claro que nas súas historietas sempre están igual!E se non mirade para  Bart Simpson!
Escollemos a Mafalda, a protagonista de moitos libros que algunha rapaza ten na casa porque lle gustaba ao seu tío,e  tentamos - e logramos-  xuntar as imaxes co texto orixinal de Quino no que a nena amósase preocupada pola humanidade e rebélase contra o mundo que lle deixan os seus maiores.
Presentamos a lectura do trimestre : De Profundis , de Miguelanxo Prado que é un libro que máis que contarnos unha historia ,esperta profundos sentimentos. Dos seus debuxos, do que nos engaiole  deste libro, conversaremos na vindeira reunión.   
Xa fóra de hora , tod@s se dirixían ás súas aulas, pero algunhas persoas aínda fixemos a foto que preside esta entrada.

5 nov 2015

Que non lles gustan os cómics

                                                  

Non podemos crelo, parece que tres destes rapaces só len mangas, aínda que todos coñecen a "Mortadelo e Filemón", "Zipi e Zape", "Spiderman"...Pero non coñecen cómics que desenvolvan historias de amor con belísimos deseños. As parellas de namorados, para eles, son " A bela e a besta", a Cincenta e o príncipe, Luís XVI e Mª Antonieta, Romeo e Xulieta...
       Ao preguntarlles, na reunión do martes, onde situarían a súa propia historia de amor ideal, varios din que preto do mar, nunha vila con pouca xente , onde puidesen ter intimidade, pero non nunha illa...Entón ensinámoslles os deseños de "De profundis": a casa, o mar, os protagonistas... e perciben que se trata dun cómic diferente ao que esperaban.. Acabamos a reunión convidándoos a mergullarse nas súas augas, para que cando volvan á superficie nos traian a imaxe máis impresionante  desta historia no mar e no amor, ou do mar de amor que creou para nós Miguelanxo Prado e, para que eles -con toda seguridade- cambien a súa percepción sobre o mundo do cómic.

4 nov 2015

Propoñemos unha historia tenra


O martes, 27 de outubro,os alumnos/as de 3ºA tiñan curiosidade polo libro que iamos ler, pero queriamos que eles o adiviñasen. Falamos do olvido e dos olvidos, de como unha persoa pode chegar a esquecer unha vida enteira, desa enfermidade chamada Alzhéimer que, para a nosa sorpresa, todos coñecían e tiñan un trato máis ou menos cercano con alguén que a sufría. Ao saber que o libro trataba este tema, adiviñaron rapidamente que se trataba de "Engurras",pois varios viran a película e choraran co drama que esta nos conta. Iso é así, porque falamos de historias cheas de emotividade, porque nos identificamos cos personaxes e sentimos a súa dor, pero tamén podemos percibir a través dos protagonistas o importante que é para estes enfermos recibir amor, amizade, sorrisos...Ao acabar a reunión, todos queremos comezar a ler esta tenra historia e ver as expresivas imaxes que a acompañan.
 

2 nov 2015

Reunión do alumnado de 4º de ESO e PDC


O Vindeiro martes, 3 de novembro o alumnado de 4º de ESO e 4º PDC terán a súa reunión do Club de Lectura.
Propoñerémosvos  a lectura deste trimestre e faredes as vosas suxestións para as dos outros trimestres.
Mais tamén falaremos dunha parella de namorados. Eses que son  envexados por tod@s porque se queren , porque posúen unha casa no mar, porque son artistas... Pero, sempre hai un pero.
Falamos mañá , ás 11:45 na Aula Multimedia e na de 1º de ESO.
  

Valorizar os libros

Rematou a semana adicada a festexar o Día das Bibliotecas Escolares.
Despois de catro días  pechou   o Mercadiño ao que, sobre todo o derradeiro día, chegaron moitos libros de préstamo. 
Dende o Club de Lectura e a Biblioteca  realizamos esta actividade para  favorecer a convivencia e a solidariedade entre as persoas que conforman a nosa comunidade escolar  e ,ao tempo ,fomentar o gusto polos libros.
Cada periodo de lecer  achegabanse rapazas e rapaces que ollaban os exemplares  mentres comentaban con compañeir@s cal lectura lles gustara, cal non, de cal querían  que o autor fixera continuación e , mesmo, cal lles quitou o sono  ao lelo polas noites.
Tamén houbo quen mercou e quen fixo efectivo o seu vale de préstamo e levou para a casa as lecturas elixidas.
Unha experiencia sempre gratificadora na que participaron, traballando activamente , todas as  persoas que compoñen o equipo da Biblioteca e, que, ademais ,son integrantes do Club de Lectura.
Mesmo se interesou pola actividade Televinte que recolleu a noticia deste Mercadiño de Libros  que podedes visionar  a partir do segundo 30.

1 nov 2015

Reencontro de amig@s lector@s

A reunión do pasado mércores na Biblioteca no IES Lama das Quendas resultou tan agradable e productiva coma sempre.
Tod@s fixeron varias lecturas no verán, están a ler agora mesmo e aínda están dispost@s a meterse na vida de  Felícito e Ismael, os dous protagonistas de El Héree Discreto, novela do Premio Nobel de Literatura Mario Vargas Llosa.
Sempre chegan interesados no que lles imos propoñer e aceptan encantad@s  as suxestións desta mediadora.
Conversamos sobre literatura e  actualidade , marcamos a data e hora da vindeira reunión  e procedemos ao préstamo dos libros que cada asistente quixo levar. Algún a pares!! Que len moito!
E dende aquí, agradecer a asistencia desas nais cos fillos pequenos aos que lles damos entretemento mentres nós falamos.E  o labor silente e constante desas persoas que conseguen traer amig@s ao faladoiro tras escoitalas comentar o que facemos. E aqueloutras que informan @s veciños e compañeiros do que lemos e mesmo do que falamos en cada reunión porque , se ben  están moi interesados na actividade, o traballo lles impide asistir ás xuntanzas.Isto fai bo aquilo de que " quen quere pode". Buscan a maneira de poder.
 Grazas!!! Convosco isto é sempre tan doado!!!

29 oct 2015

Recordamos que esquecemos

É difícil esquecer? É doado? A rapazada de 3º B de E.S.O e 3º P.M.A.R.  cre que as cousas  banales poden ser  esquecidas con facilidade.Pola contra , ás veces queres  eliminar  algo da túa memoria e esta insiste en que permaneza.
Eliminar algo da memoria é bo ou malo? Tamén depende. Segundo o alumnado, se un se esquece de algo pouco importante  non hai problema, o peor  é  cando o esquecido carrexa  consecuencias  negativas. Como exemplo , e neste punto o alumnado amosou un grande dominio da ironía, falaron do problemático que resulta esquecerse de facer os deberes fronte ao nimio que consideran esquecerse dalgunha outra cousa.
Comentamos anécdotas que viviran relacionadas co esquecemento e acabamos falando do libro que imos ler neste trimestre Engurras de Paco Roca.Cando se enteraron de que os personaxes  do cómic padecen alzhéimer , unha enfermidade que implica , entre outros síntomas, a perda da memoria  entenderon que toda a conversa anterior fora un xogo comparado coas manifestacións deste mal que está ao noso arredor.
Finalizamos a sesión traballando cunhas viñetas. En parella crearon o texto para compoñer unha historieta e para írmonos introducindo no mundo do cómic.

25 oct 2015

Reunión do alumnado de 3º de E.S.O

    
Algunha vez esqueceches  algo importante?
És das persoas que non lembran o que tiñan que facer?
Desarcordaste do que queres con facilidade ou por máis que o intentes non logras quitalo da cabeza? 
Que será mellor esquecer facilmente ou ter unha grande memoria para lembrar sempre todo?
O vindeiro martes  , 27 de outubro, podemos achegar argumentos a favor e en contra de lembrar ou esquecer. Trae as túas razóns  á reunión do Club de Lectura do alumnado de 3º de ESO.
Por favor, non vos esquezades!!!
 


 
Design by Free WordPress Themes | Bloggerized by Lasantha - Premium Blogger Themes | Justin Bieber, Gold Price in India