20 dic 2017

De grifos e vihuelas...

Pois a verdade é que “Xa vai o griffon no vento” de Alfredo Conde non chegou a enganchar aos asistentes á reunión do club de nais, pais e amigxs… As vidas paralelas dun inquisidor na Galiza do século XVI e un escritor/profesor galego dos anos ’80 do pasado XX, a Armada Invencíbel e o contrabando de libros que traían as novas ideas humanistas ao Santiago de Compostela dos tempos de Felipe II, a animada vida universitaria dunha pequena cidade francesa… non foron quen de convencer aos membros do club, cecais por unha linguaxe e unha estruturación arrevesada e en ocasións barroca, tal como se comentou na reunión mantida. Ben, non sempre se acerta…

Iso si, para ambientar os capítulos renacentistas dos tempos de Felipe II (nos que discorre parte da novela de Alfredo Conde) e seu predecesor Carlos I, houbo música ao vivo: un par de pezas interpretadas cunha vihuela de man feita polo luthier Asier de Benito Guío, a primeira de Diego Pisador (“Dezilde al cauallero que”, 1552), e a outra de Luys de Narváez (“Cuatro diferencias sobre Guárdame las vacas”, 1538).

A ver se hai máis acerto para a vindeira!

19 dic 2017

Historias dun pasado non tan afastado...

“Por que as sombras non teñen ollos” de Luís Manuel García Mañá foi o libro escollido para o club de lectura do profesorado e persoal non docente, e sobor o que tivemos unha máis que animada charla na reunión celebrada na Aula de Música do Lama das Quendas.

Salientouse o bo facer do escritor por saber, dun feito histórico descoñecido para todxs xs que estabamos ate que ese libro chegou ás nosas mans, mesturar o real e o ficticio, o xénero narrativo con toques xornalísticos e case ensaísticos (a historia do Couto Mixto na fronteira luso-ourensá é case unha constante na obra de García Mañá), o enxebre do rural galego con ambientes máis urbanos e cosmopolitas nunha época convulsa e “estraña” na posguerra española e xa no final da II Guerra Mundial… É curioso como unha historia que pode dar moito como a presenza de nazis por terras galegas (algo documentado por historiadores e estudosxs) non se teña explotado tanto na nosa literatura, con todo o que elo pode dar de si, como ben se pode ler nesta novela.

Todo elo levounos a rememorar historias propias das nosas infancias, non tan afastadas (ehem): as lareiras coas cuadras embaixo, os primeiros “cuartos de baño”, a tremenda friaxe nas xornadas invernais, os camiños enchoupados na lama…

Tamén falamos, por suposto, de como as fronteiras trazadas nun mapa non soen significar nada, na maioría dos casos, no mundo real, no día a día das comunidades e nas relacións que se producen entre grupos humanos, e como moitas veces as leis propias deses territorios “afastados do mundo” están un pouco (ou un moito) á marxe das leis escritas e “pensadas” nas “capitais” alleas a todo o que acontece nas periferias…


Seguinte libro: “Non me deixes nunca”, do recente Nobel de Literatura Kazuo Ishiguro.

14 dic 2017

Maus, e reflexións sobor a BD...

Fantástica charla a que tivemos hoxe no Club de Lectura coas dúas alumnas de Bacharelato que puideron vir á reunión (época de exames, xa sabedes…) e que versou sobor “Maus”. Mais non falamos do argumento desta coñecida banda deseñada (BD), nin da nosa opinión dela (tería sido unánime e nun par de minutos teriamos rematado), senón de como un libro de BD pode ser empregado na educación, xa non en primaria ou secundario, senón tamén a calquera idade. Tanto Hasna como Ana falaron da súa experiencia co texto un par de cursos antes cando o empregaron como apoio nas aulas de Historia durante o estudo da II Guerra Mundial.

E falando, e divagando, e compartindo, fomos levando o tema cara temas xa máis de actualidade, mais partindo dos libros (máis concretamente, as BDs) de temática histórica, e como poden ser un xeito óptimo, se estes están ben escollidos e argumentados, para tratar os diferentes modelos sociais, políticos e económicos, os movementos que favorecen e potencian o emprego da violencia, a diversidade de xénero, o papel da muller no xa ben entrado século XXI… Si moitos temas, e pouco tempo… mais pinceladas que amosan como de algo tan sinxelo como uns cantos trazos nuns papeis, tres persoas de idades e procedencias ben diferentes, poden atopar un espazo común de comunicación e encontro…

Por certo, os seguintes textos foron escollidos por elas… e veña manga!!!

Antes, iso si, algo de lírica galego-portuguesa...

30 nov 2017

Ate a próxima, Astérix e Obélix!

E chegamos á fin da nosa viaxe ao tempo dos romanos da man de Astérix e Obélix… Pouco máis que dicir que non se comentara xa nas pasadas reunións cos grupos de 2º da E.S.O.: alumnxs aos que non lles fai moito aquel iso de ler bandas deseñadas, outrxs que están encantadxs (algún vello fan dos galos había por aquí!), historias xa comentadas e outras novas, coma a de “Astérix e os pictos”, na que aparece a terra da Caledonia ou, como se coñece na actualidade, Escocia. 

Mais coma sempre, moito banquete con xabarís, moitas liortas cos romanos despois duns tragos de poción máxica, moitas viaxes e moitas aventuras polo pasado das terras que arrodean o Mediterráneo e un pouco máis aló… Sen dúbida, un xeito diferente de achegarse á historia e de xogar a descubrir que foi e que non foi…

E veña xa o segundo trimestre de lecturas!


23 nov 2017

Outra ración de poción máxica, por favor!!!

Na reunión co alumnado de 2º E.S.O. B e C continuamos a falar dos nosos benqueridos Astérix e Obélix. Algúns dxs integrantes deste grupo comentaron que non eran moi seguidorxs da banda deseñada, xa que consideraban algo lioso o seguir as viñetas e entender ben a orde dos bocadillos cos textos e diálogos. Houbo un pequeno debate a favor e en contra deste xeito de facer literatura, no que quedou de manifesto que sempre hai gustos e formas diferentes de ver as cousas, mais igual de válidas e compatibeis as unhas coas outras á hora de compartir a nosa afección pola lectura.

Falamos despois un pouco das historias escollidas polo alumnado deste grupo, que foron “Astérix nos Xogos Olímpicos” (viaxamos un pouco ás orixes destes na antiga Grecia), “A volta á Galia de Astérix” (de novo apareceu Xulio César e as súas liortas con este grupo de irredentos galos) e unha achega diferente, “Astérix e os seus amigos”, unha homenaxe a Uderzo de varixs autorxs do cómic mundial, con visións diferentes, tanto no visual como na escrita, dos nosos heroes.

Quedounos, iso si, para a outra conversa, o de como se fan os debuxos animados… e é que o tempo non dá para todo!



16 nov 2017

Unha ración de poción máxica, por favor!

Hoxe tivemos a reunión co grupo de 2º E.S.O. A, onde falamos de catro das aventuras dos nosos heroes galos Astérix e Obélix, sempre acompañados do pequeno e fiel Idéfix: “Astérix lexionario”, “Astérix O Galo”, “Astérix e as 12 probas” e “Astérix en Bretaña”. Nelas o común denominador é deixar quedar mal aos pobriños (ben, realmente, non tan pobriños) romanos grazas, ademais da máxica poción que lle confire unha forza sobrehumana a aquel que a tome, da astucia e intelixencia, ademais do traballo en equipo, que posúen os galos. Mais o verdadeiramente interesante destas bandas deseñadas, creadas hai case 60 anos polos franceses René Goscinny e Albert Uderzo, é que xunto con personaxes ficticias, como os propios Astérix, Obélix, Idéfix, Falbalá, Panorámix o druída, Asurancetúrix o bardo, o xefe da aldea Abraracúrcix ou o vello cascarrias Edadepiédrix, aparecen outras, xunto con sucesos ou elementos, que formaron parte da historia. Así, na conversa de hoxe, saíron a colación Xulio César e o seu fillastro Bruto, os traballos de Hércules e o xigante Xerión, relacionados coa cidade de A Coruña; as conquistas da Galia e da Bretaña; as Médulas e as cidades de Lvcvs Avgusta e Avriense; os significados das verbas “druída” e “bardo”, e ate incluso o "tea time" dxs inglesxs!


9 nov 2017

Próximas reunións do alumnado!!!


6 nov 2017

Filosofemos en BD!


20 oct 2017

Listado dos libros do primeiro trimestre!


Grupo de nais/pais/amigxs!!!

Onte á tarde desvelamos o libro do grupo de "A quenda do libro" que faltaba, o de nais/pais/amigxs...

19 oct 2017

Club do profesorado e persoal non docente!

Velaquí o libro deste primeiro trimestre para o grupo do profesorado e persoal non docente de "A quenda do libro"...

16 oct 2017

Club de 3º e 4º de E.S.O.!

Nun día horríbel para todxs xs galegxs e os nosos veciños ao sur do Miño, vimos de escoller o libro para o primeiro trimestre do grupo de 3º e 4º de E.S.O.

13 oct 2017

Club de 1º e 2º de E.S.O.!

Hoxe tocoulle a quenda ao alumnado de 1º e 2º de E.S.O.! Adiviñades o que imos ler?

11 oct 2017

Maus

Desvelamos o primeiro título para este primeiro trimestre do Club de Lectura do alumnado de Bacharelato...

9 oct 2017

Datas das reunións iniciais!


5 oct 2017

Botamos a andar neste 2017/2018!!!


24 jun 2017

E chegan as vacacións!!!

Xa estamos no verán!! Remataron as clases e as actividades deste club de lectura. Chegou o tempo de descansar, falar, ir á piscina ou á praia, reencontrarse con amig@s e familiares que volven á vila...En definitiva , xa é hora de sentir o relax das vacacións, non credes?
As redes de A Quenda do Libro tamén sofrirán un apagón estival pero antes queremos desexarvos a tod@s o mellor dos veráns, pero iso si, mellor se hai un libro a man...
Felices  vacacións e boas lecturas!!

23 jun 2017

X Xornadas dos clubs de lectura

O pasado sábado, 17 de xuño, tivo lugar en Santiago de Compostela, a X Xornada dos Clubs de Lectura de Galicia. Asistín a ela como coordinadora do noso club e , para que saibades o que aconteceu, relatareivos o que vin, escoitei, lin, sentín...
Ás 9:00h xa estaba recollendo a acreditación e lendo o programa de actividades que, coma sempre, se solapan e impiden que asista a moitas delas ( ata que posúa o don da ubicuidade). Falarei daquelas nas que participei.
Comezaba a xornada coa actuación de Pista Catro que facía un espectáculo circense animando a ler e a vivir moitas vidas  a través dos libros.
A continuación, procedeuse á entrega do Premio dos Clubs de Lectura 2017 a Miguelanxo Prado que, espontáneo e natural coma sempre, agradeceu o premio e reivindicou a necesidade de que a banda deseñada ocupe o seu oco no eido da cultura dun xeito menos  casual.
Logo falou o conselleiro pero , como estaba como político, dixo o de sempre.
Na actividade inaugural, Óscar López , director e presentador do programa "Página Dos" da TVE impartiu un orixinal obradoiro para axudar a facer un programa piloto sobre libros e lecturas. Nel participaron uns rapaces e rapazas ademais da escritora Ledicia Costa e a booktuber Violeta Moon. Quedounos claro que tod@s @s lector@s  tamén somos quen de prescribir lecturas a outr@s.
Era media mañá cando Inés Miret (consultora especializada en proxectos dixitais de lectura, libro e bibliotecas) iniciou o seu relatorio titulado " Lectores  [des ]conectados. Jóvenes,redes, afinidades y libros". Interesante charla que resumiría nunha das frases que pronunciou:"Internet é unha selva amazónica de conversacións sobre libros, moitas delas invisibles para nós".Fagámolas visibles e axudaranos coas nosas lecturas.
Rematou a xornada da mañá con Mercedes Queixas, secretaria da "Asociación de escritoras e escritores en Lingua Galega"  quen nos explicou e amosou a cantidade de recursos que a páxina web deste grupo contén e que poden axudar aos lecto@s de literatura galega. Fixo fincapé nos fantásticos paseos literarios que se desenvolven, de cando en vez, nalgunhas cidades galegas.(Chantada aínda é vila).
Eran as 14:15:hora de xantar. Desta volta xantamos no parking do Palacio de Congresos e Exposicións tendo que recoller os alimentos en diferentes camións acampados ao arredor. Baixo un sol de xustiza, co termómetro marcando 35º pero cunha sensación térmica de moitos máis , con longuísimas colas de case unha hora decidín que ese mediodía íame alimentar dun anaquiño de empanada e  de "lecturas". (Os meus tiques de comida están case intactos). Moitas outras persoas fixeron o mesmo. De verdade que levo toda esta semana intentando recuperarme do "baixón" dese abafante calor soportado o sábado.
Xa pola tarde, dentro, co aire acondicionado,tras outra actuación de Pista Catro iniciamos un intercambio informal de experiencias  entre @s diferentes profesor@s que asistiamos á actividade. Sempre se aprende escoitando aos demais e mesmo xorden ideas novas durante as conversas.
Ás 17:00 chegou a hora do encontro co autor que neste caso foi César Mallorquí ( autor de Las lágrimas de Shiva, El último caso del señor Luna ou  La isla de Bowen que recomendamos no noso centro). O título da conferencia era "Elogio de la mala literatura". E veu dicir que o importante é que @s adolescentes lean.O que sexa.Que lean. Se a lectura é de calidade, estupendo. Pero se non o é, xa terán tempo de ler boa literatura. Pola contra se non len nada, nunca se achegarán ás grandes obras.Cre que o  importante é que adquiran o hábito. Concordo plenamente.
Unha mágoa que interromperan a súa exposición polo tempo esgotado.
O fin de "festa" correu a cargo de Xabier Díaz e Adufeiras de Salitre. Música galega de calidade para seducir @s presentes moitos dos cales se arrancaron a bailar un pasodobre ou unha xota totalmente desinhibid@s. Fermoso colofón.
Como resumo e impresión persoal:interesante xornada da que volvín satisfeita.Boísima organización (agás o xantar), moreas de actividades interesantes e moit@s escritor@s convidad@s para realizar obradoiros... Pagou a pena investir 13 horas do meu sábado ( dende as 7:30 h que saín da casa ata as 20:30 que regresei) para vivir entre libros, lector@s,escritor@s...Estiven no meu hábitat.
Parabéns á Asesoría de Bibliotecas polo enorme esforzo para organizar este evento.

16 jun 2017

"A literatura é unha mentira aceptada por tod@s"

Tarde de literatura e conversa con Antón Riveiro Coello quen nos ofreceu unha extensa explicación dos elementos da súa novela A ferida do vento  na que cento e pico personaxes reais viven e sofren antes de cicatrizar as feridas e continuar a súa vida.
Antón aclarounos como decidiu escribir sobre unha ilusión, sobre unha perda vivida na adolescencia e como artellou unha historia na que fixo aparecer membros da súa familia e veciños da súa vila (algúns deles afectados polo vento frío que lles entrou na cabeza).
Compartiu cos asistentes, dun xeito pormenorizado, as mentiras que están na novela; o seu xeito de traballar ao contruír as súas obras; as súas ideas arredor da literatura; a importancia que lle atribúe á música ou ao cine nos seus textos; as persoas para as que escribe, es@s lector@s @s que desexa chegar coa súa produción.E sobre todo falounos de Carlos Casares.
Os pais e as nais fixeron apuntamentos sobre a
novela que leran. Así falaron da presenza da cor amarela nela ( quizáis sexa unha das cores preferidas do autor);da indignación que sentiron ao ler que Antón tiña relacións coa alemá ao pouco de morrer Gabriela ( demasiado pronto para esquecer a quen tanto quería ); da escasa participación do avó Rafael ;do aprecio polos Bee Gees e a súa música ( somos maiores!!); do que presta  comprobar na súa novela o ben que describe os sentimentos...
A preguntas d@s lector@s, Riveiro Coello,confesou que sempre escribe coa idea de facer "a mellor novela do mundo". Logo a realidade , pasado o tempo, é que cambiaría  cousas.
Ante a petición de que recomendase algunha outra obra súa para seguir "léndoo", mencionou algunhas e logo citou a que dicía lle dera máis lectores ou a que lle dera máis prestixio.
Rematou o encontro  animando a escribir porque, se ben é certo que para facelo debemos posuír unha disposición xenética, tamén o é que hai moito que practicar e, sobre todo, moito que ler.
Quedamos en débeda con Antón pola súa xenerosidade e cordialidade.
Grazas por vir!!

15 jun 2017

A viaxe da xente da Quenda do Libro

O pasado xoves saímos de viaxe cun grupo de rapazas e rapaces  de diferentes cursos da ESO e Bacharelato.O certo é que decidiramos viaxar no mes de xuño crendo que eran data máis axeitada pola acumulación de actividades extraescolares que se concentran en maio; pero ao final, tampouco foron as datas adecuadas porque se concentraron os exames dado que moita da nosa rapazada viaxaba ( e está agora mesmo alí) a Cork en  Irlanda e outr@s saen mañá de viaxe cultural a Extremadura e Andalucía, e moit@s alumn@s non nos puideron acompañar por terras ourensás.Unha mágoa!

Partimos de Chantada pola mañá e dirixímonos ao Mosteiro de San Pedro de Rocas, en Esgos. Un mosteiro no medio dunha fermosa paisaxe. A rapazada ía coa información necesaria para fixarse no campanario sobre unha pena exterior, or arcos labrados nos muros, os sarcófagos escavados na mesma roca...
Neste  mosteiro atopamos, hoxe, o Centro de Interpretación da Ribeira Sacra  con paneis informativos e exposición dos diferentes oficios da contorna.



Despois dirixímonos ao Castro Santomé. Fermosas as vistas dende alí!
E moi interesantes os restos castrexos e romanos que se poden ver. O que máis lles impactou foron as pías que facían de lagares na antigüidade e as espectaculares marmitas de xigante  que se ven no río Loña que vai encaixado no fondo do val.




 
Visitados os arredores, entramos na Cidade das Burgas. Na Praza Maior  collemos o tren turístico que nos levou polo Parque de San Lázaro, Ponte Romana, A Chavasqueira, Muíño da Veiga para chegar a xantar ás pozas de Outariz onde pasamos a tarde a remollo entre risas, bromas, conversas e xogos.
Ás 17:45 iniciabamos o regreso a Chantada coa sensación de ter aproveitado moi ben o día e a ledicia de que todo saíra tal como planearamos para esta rapazada á que debemos felicitar polo seu exquisito comportamento e predisposición a aprender e a súa valoración da actividade.
Fantástico día para tod@s!

13 jun 2017

Reunión do club de lectura de pais/nais e amig@s de A Quenda do Libro

Chegou o día do encontro con Antón Riveiro Coello! Será mañá, mércores 14 de xuño, ás 17.30 h. na Biblioteca do centro.
Nunca fixeramos tan avanzado xuño  a reunión deste grupo de lector@s pero como desexamos  que o escritor nos visite, tivemos que acomodarnos ás súas datas libres , que eran poucas por mor do éxito que está acadando  A ferida do vento.
Estamos desexando falar con el e escoitalo. Para nós, lector@s  impenitentes , será todo un pracer.
Na fotografía pódese ver o recuncho que lle adicamos na biblioteca do centro.

7 jun 2017

Celebramos que lemos

Rapazas e rapaces dende 1º de ESO ata 1º de Bacharelato déronse cita o pasado martes  no Salón de Actos para festexar que rematamos un ano de lecturas.
E mentres daban boa conta dos petiscos que tiñamos facían grupos para convivir intercambiando comentarios , bromas e conversas o que resultou moi agradable.
Mellor mirade algunhas fotografías e xa vos facedes unha idea de como o pasamos.



4 jun 2017

Festa final do Club de Lectura

Festaaaaa!
Sabedes que na semana próxima se vai a rapazada de 4º de Viaxe de fin de estudios de E.S.O. ,e moito alumnado dos diferentes cursos da E.S.O. e 1º de Bacharelato  parten para Cork para mellorar as habilidades no idioma de Shakespeare, así que nesta semana rematamos coas actividades do club , no que se refire aos alumnas e alumnos.
As dúas que nos quedan son a festa de fin de curso, o este martes, 6 de xuño ; e a viaxe do xoves, 8.
Mirade o cartel e se vos apetecen uns petiscos e unhas risas na compañía doutr@s lector@s, vide ao Salón de Actos durante o recreo do martes.
Agardámosvos!!

Engaiolad@s pola narrativa de Carlos Casares

A  tod@s nos encantou O sol do verán. Cremos que é unha fantástica obra literaria na que , con recordos que van e veñen, que se meten uns dentro dos outros, e empregando unha grande técnica narrativa se nos conta unha historia que se a contaramos nós resultaría propia dun folletín.
Gustaronnos varias cousas. Por exemplo, a maneira de describir o escenario, idílico e sensual, no que os nenos e mozos Carlos e Helena gozaron da súa infancia e adolescencia. É unha especie de paraíso terreal no que seguen vivindo como adultos.
Destacamos o hábil xeito de facernos revivir a época da nosa infancia tan chea de sentimentos e aprendizaxes grazas ás lembranzas dunha muller á que lle dá palabras e vida un escritor ourensán.
 E que dicir de como armou a psicoloxía dos personaxes? As reaccións  destes ante os acontecementos  vividos poñen de manifesto a comprensión do ser humano, a serenidade e aceptación sen berros, sen reaccións violentas e desmedidas.
En fin, a lectura desta novela  póstuma de Casares foi unha actividade gratificante, tenra e fluída; desenvolveuse como o curso de auga que trancorre por distintos tramos vitales e remata, trala gran fervenza  que foi a lectura das cartas que gardaba a nai de Helena, na fusión coas augas do mar na desembocadura.
O libro comeza coa narración do suicidio de Carlos. Desde o principio sabemos o que sucedeu ao máis puro estilo de Crónica de una muerte anunciada,  pero necesitamos  adentrarmos no relato máis e máis. Na procura de que? Non buscabamos nada, só nos deixamos levar polas palabras dun mestre da narrativa galega. E ben que desfrutamos. Algúns con grande sorpresa porque non leran nada de Carlos Casares fora dos  artigos periodísticos, no seu momento, e o autor resultou todo un descubrimento.
Queda moito del por ler!

1 jun 2017

Reunión do club de lectura do profesorado

Mañá venres,2 de xuño,  na Aula Multimedia , xuntarémonos para falar de O sol do verán, novela póstuma de Carlos Casares, o escritor homenaxeado no Día das Letras Galegas deste ano 2017.
Falaremos das vidas de Helena e Carlos no Abeiro (un verdadeiro paraíso)  de mediados do século pasado.Comentaremos o tráxico final da novela, ou era o tráxico principio?
Daremos as nosas opinións e compartiremos  un agradable tempo de lecer na mellor das compañías: amig@s e lecturas.

 

 
Design by Free WordPress Themes | Bloggerized by Lasantha - Premium Blogger Themes | Justin Bieber, Gold Price in India