Comezamos a xuntanza do martes, 28 de outubro, lembrándolles aos alumnos/as que nesa data se celebra o Día Mundial da Animación e queriamos festexalo á nosa maneira proxectando un vídeo do gran Tadeo Jones . Tiñamos todo disposto pero atopámonos con algunhas dificultades para proxectalo e a pantalla insiste en permanecer en branco,claro que as nosas cabezas non o están e, en vez de ficar á espera do vídeo,decidimos realizar algúns xogos relacionados con Das Cousas de Ramón Lamote que é o libro que imos propoñer como lectura de 3º A de E.S.O.
Así, no texto orixinal aparece a sigla AMCFGCPF ( Asociación de Mulleres da súa Casa que Fan un Gasto Considerable en Pescada Fresca).Sen darlles o resultado convidámolos a que os 18 rapaces e rapazas asistentes pensen que poden significar todas esas letras xuntas, e sáennos propostas bastante graciosas como " Asociación de Mais Cuarentonas facendo Gustosas a Comida para Pais e Fillos" ou "Amable Médico Científico Físico Guapo Cerrado Pedro Feo","Antonte a Miña Carmen Foi Graciosa Comigo Antes de Falar","Asociación Maioritaria Con Forza Grandísima Contra partidos Falsos"...
Á pregunta , que é un Entomodelfo ? responden que é un tipo de Elfo; mentres outros cren que Marmolubio pode ser o nome dun mar.
Mentres enredamos coas "nosas cousas" e coas de Ramón Lamote, conseguimos que apareza en pantalla o vídeo de Tadeo Jones e rimos coas aventuras deste peculiar personaxe no "non tan antigo" Exipto.
Agora toca ler e pasalo ben co retranqueiro Ramón Lamote Miñato , debuxante de soños por encarga.
0 comentarios:
Publicar un comentario